原來係神蹟
2024/Jul/02 11:58 Filed in: 分享 | 葉穎麟 Alan Ip
呢張圖好得意，如果耶穌今日要餵飽五千人，可能真係會有呢啲問題。講起五千人，曾經有人問：究竟耶穌點樣可以令講五千人清楚聽到佢講嘢？又無音響⋯⋯
曾經聽過有人話可能耶穌講嘅時候，聲音傳到最盡，冇聲喇，就會有人再將耶穌嘅說話重複傳一次，去到盡又冇聲喇，又再傳一次，直至傳到去人群嘅最尾。（所以講到天黑⋯⋯）
又有人咁樣講，耶穌先教識咗12門徒，然後再由門徒分班教學。
睇吓commentary，學者又話俾我哋聽，因為地形好傳聲，所以五千人都會聽得清楚。
以上嘅解釋，我冇特別嘅回應，但我會諗：究竟耶穌係點樣行喺水上面嘅呢？因為鹽分夠所以浮得起？但好似係淡水湖喎？究竟耶穌又點樣醫好血漏嘅女人？科學上點解釋？耶穌啲口水同埋泥有咩功能，可以令盲仔睇得見？
原來係神蹟。
咁究竟耶穌可唔可以行神蹟以致呢五千人都聽得清楚呢？耶穌行咁多神蹟，我哋都冇問過究竟點解會發生，但係咁多人清楚聽到佢講嘢就要解釋？有啲茅。喺同一個福音片段，點解可以餵得飽五千人？
人如果能夠聽得清楚上主嘅聖道，無可否認已經係一個神蹟。
主佑。
（原文Link：https://www.facebook.com/share/FWemc34j7ifrXQu7/?mibextid=WC7FNe）